تعرفوا الجنة عاملة إزاي  :))

 

‫#‏عُشَاق_الجنة‬ :)) *

 

احنا دلوقتي واقفين على باب الجنة خلصنا حسابنا و ضمنا مكاننا فـي الجنة ، علشان نروح الجنة ، النار هتبقى تحت رجلِنا و هنعدي عليها عن طريق حاجة اسمها الصراط اللي ذُكرت فـي سورة الفاتحة اهْدِنَا الصِّرَاطَ الْمُسْتَقِيمَ (6) صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ (7) ، يـا رب خليلنا الصِراط صِراط المؤمنين اللي رَحَمتهم وغفرتلهم ، الصراط ده عامل زي الشعرة واَحِد من السيف ، المؤمن الصراط هيبقي بالنسباله زي الجسر و هيعدي من عليه فـي لمح البصر ولو عمله مش صالح هيقع من على الصراط و يترمي فـي النار ، عدينا الصراط و الحمد لله هنقف فـي مكان واسع كده و نستني سيدنا النبي صلى الله عليه وسلم ، يخلص شفاعتُه لـ باقي أُمِتُه علشان ييجي و يفتحلنا باب الجنة ، ربنا سُبحانه و تعالى قال: يوم نحشر المتقين وفداً ، يعني مش هنفضل واقفين على رجلنا كأننا فـي طابور الجمعية لا هنبقى راكبين جِمّال و أحصنة وفيلة ، ربنا بيقولك انت تعبت فـي الدُنيا و مش هتعبك فـي الآخرة ، هنفضل واقفين منتظرين سيدنا النبي وربنا يـا رب يرزُقنا نشوف واحد من اللي بنحبهم يكون حُشِر معانا فـي الجنة ، واقفين و مستنين سيدنا النبي و الأبواب زحمه جداً ، هقولك معلومة لطيفة النبي فـي وصفه لـ أبواب الجنة قال بين الباب و مصرعيه مسيرة 40 عاماً ، يعني من أول الباب لآخره 40 سنة مشي ، جيه سيدنا النبي بعد ما تشفع لأُمِتُه و استني لحد ما الناس كُلها تتحاسب ، جيه سيدنا النبي و خبط على باب الجنة بيرد عليه رضوان حارس أبواب الجنة و يقوله من أنت !؟ يقول سيدنا النبي محمد ابن عبد الله ، يقوله رضوان نعم بك أمرت الا افتح إلا لك ، أنا إتأمرت من الله عز و جل مفتحش الباب غير ليك ، اتفتحت الأبواب و دلوقتي بتشم ريحة المسك الي طالع منها و الهواء العطر اللهم اجعلنا من سُكان أهلِها .

* وبعد ما ندخُل الجنة !؟ *

أول ما دخلنا الجنة هنلاقي نهرين أول نهر لما هنشرب منه هيتشال من بطوننا الأذى ، يعني لما ناكُل ولا نشرب بعد كدة مش هنحتاج نِدخُل الحمام الجنة طاهرة و ما فيهاش الكلام ده ، وحتى العرق اللي هنعرقُه هيبقى ريحتُه مِسك ، و النهر التاني لما هنشرب مِنه هيرجع لوشنا النضارة زي لما تقعد جوه الجاكوزي كده وبعد ما تشرب من النهر التاني هتلاقي ولدين صُغيرين ها ييجوا و ياخدوك من إيدك ويودوك بيتك واحد منهم هيسبقك ويقول لمراتك إنك إنت جيت ( الحور العين ) اانت رايتُه بعينك !؟ و تطلع على الباب تستناك وتدخلك بيتك ، و ده كان كلام سيدنا علي بن أبي طالب . سيدنا النبي قال وينحر لهم ثور كان ياكل من أطراف الجنة هيتدبحلنا ثور كبيييير جداً كان بيأكُل من الجنة وبيتحضر لنا ناكلُه أول ما ندخُل الجنة ، و الشرب هيكون من عينٌ إسمها سلسبيل .

* طيب بيوتنا هتبقى عاملة إزاي !؟ *

- تعالوا نعرف ونتخيل بيوت الجنة هتكون عاملة إزاي ، سيدنا النبي قال لبنة من فضة و لبنة من ذهب و ملاطها مسك وحصباؤها اللؤلؤ و الياقوت و ترابها زعفران ، اللبنة دي زي الطوبة طوبة ذهب و طوبة فضة و المونة الي فـي نُصها الي زي الأسمنت كدة من المِسك وتُراب الأرض مِن الزعفران مُتخيل !؟ ، وفيه بعض البيوت زي اللؤلؤة طوله حوالي 60 ميل سيدنا النبي قال لون الؤلؤة هيبقي أخضر أو أحمر أو أصفر ، و الحيطان و الأرض هتبقى مِن اللؤلؤ ، طيب ده كده البيوت هتبقي شبه بعض !؟ سيدنا عبد الله ابن عباس قال أن الناس يعرفون بيوتهم فـي الجنة كما يعرفونها إذا انصرفوا من صلاة الجُمعة ، يعني هتبقى عارف إن ده بيتك كأنك لسة على الأرض و روحت صليت الجمعة و عارف بيتك فين وترجعله ، البيت بتاعك هيكون ليه 70 باب كل باب من الضرفة للضرفة زي اللؤلؤة كده حاجه فخمة فخمة يعني طيب ماتيجي نروق على نفسنا كدة و نزرعلنا نخلتين حلوين قُدام بيتنا ، سيدنا النبي قال من قال سبحان الله و بحمده غرزت له نخلة فـي الجنة وإنت و شطارتك بقى كُل ما تقول أكتر كُل ما بيتك يتملي نخل أكتر .

* و هنلبس ونأكل إيه !؟ *

- بص بقى سيدك النبي بيقولك إيه ، إنك لاتنظُر إلى الطير يطير فـي الجنة فتشتهيه فيخِر بين يديك مشوياً ، لو بصيت لـ الطير طاير فـي الجنة و نفسك راحت ليه هتلاقيه نزل قُدامك مشوي ، عاوز اقولك حاجة لطيفة إن الجنة ما فيهاش دُعاء الجنة فيها إشتهاء ، مُجرد ما يبقي نفسك فـي الحاجة تلاقيها إتحققتلك ، يُطافُ عليهم بصحاف من ذهب و أكواب ، بيلف علينا 70 خادم كل خادم معاه صينية من ذهب وكل صينية فيها صنف أكل مُختلِف عن التاني يعني 70 صنف ، و إنت قاعد تحت شجرة بُستانك الجميل في بيتك لو بصيت على تُفاحة و نِفسك فيها تلاقي الفرع نزل لحد عندك تأخُد اللي إنت عاوزُه مِنُه ، و دانيةٌ عليهِم ظِلالُها و ذُلِلت قُطوفُها تذليلاً ، طيب كده كَلنا و ملينا بطننا اللبس بقى ، سيدنا النبي إتسأل عن لِبس الجنة عامل إزاي يارسول الله !؟ قال صلى الله عليه و سلم ، تشقق عنها ثمرة الجنة ، يعني مثلاً لو بتدور على جاكت ولا تيشيرت ولا قميص فيه ثمار متعلقة على الشجر تفتحها يطلعلك اللبس اللي إنت عاوزُه مُتخيل !؟ ما من شجرة في الجنة إلا و ساقُها مِن ذهب ، لما ساق الشجرة من ذهب اومال ثمارها و فروعها عاملة إزاي !؟ في شجرة بقى إسمها طوبى و مِتهيائلي ناس كتير عارفاها سيدنا النبي قال طوبى لِمن رأني و آمن بي ، زي الصحابة و الصالحين في عصر النبي ، قال صلى الله عليه و سلم و طوبى ثم طوبى ثم طوبى لِمن آمن بي و لم يراني ( إحنا ) ، و قال طوبى لِلغُرباء ، الغُرباء زي ماقال سيدنا النبي الذين يُصلِحون إذا أفسد الناس ، يعني تبقى محافظ على صلاتك و دينك و تلاقي ناس تقولك إيه ياعم الشيخ و تستحمل علشان الجنة و علشان عارف إن ضيافة ربنا أجمل بكتير .

* شكلنا و سننا في الجنة :))

سيدنا النبي قال خلق الله عز وجل آدم على صورته طوله ستون ذِراعاً فكُل من يدخُل الجنة على صورة آدم وطولُه ستون ذِراعاً ، حسب أقوال الرسول إن هيكون طولنا 60 ذراع و الذراع 64 سنتيمتر و شكل سيدنا آدم هنبقى أبراج بالصلاة على النبي ، و سننا زي ما قال الحبيب المُصطفى يدخُل أهل الجنة ، الجنة جرداً مرداً مُكحلين أبناء ثلاثين أو ثلاث وثلاثين سنة ، لما هندخُل الجنة هيبقى عُمرِنا 33 سنة و ما فيش شعر في جسمنا و ما فيش شباب عندها لحية :))

* كلام ربنا لينا *

- ربنا سُبحانه و تعالى بيكلمنا في الجنة و بينادي علينا مُتخيل !؟ وانا متعمد أقول علينا لإن بإذن الله هنكون من أهل الجنة ، بيرسل لينا كبش ( خروف ) و يتدبح قُدامنا ويقول عز و جل أتعلمون ما هذا !؟ نقول هذا الموت ، معناه إننا هنفضل مُخلدين في الجنة مابنموتش ما بنتعبش ما بنتمرضش ما بنكبرش ولا بنعجز و يطلعلنا تجاعيد ، ، تاني نداء لله عز و جل هيندهُه علينا الله عز و جل ، و برضه مُتعمد أقول علينا ، هل رضيتُم !؟ مُتخيل عظمة ربنا !؟ ربنا سُبحانه و تعالى بيقولك راضي بكل اللي إديتهولك !؟ حاسس بحاجة ناقصاك !؟ حاسس إنك تعبت في الدُنيا وما خدتش حقك في الآخر !؟ هنرُد و نقول و بإذن الله هنكون إحنا ، كيف لانرضى و قد بيضت وجوهنا .

* تعالى بقى نشوف نهر سيدنا النبي فـي الجنة نهر الكوثر !؟ وليه ربنا أهداه لـ النبي *

- سيدنا النبي ما كانش بيعيش ليه أولاد صُبيان و مات 3 من صُبيانُه ، في يوم أبو جهل عايرُه و قاله يا أبتر ، البتر ده القطع ، يعني يا مُحمد إنت مبتور ذُرية الصُبيان مالِكش إبن تتسند عليه ، فـ النبي حزِن جداً ، ربنا سُبحانُه و تعالى نزل عليه سيدنا جبريل بسورة الكوثر ، إن أعطيناك الكوثر ، يامحمد أنا ما رزقتكش بصُبيان بس عوضتك بنهر في الجنة ( الكوثر ) ، فصلي لربك و إنحر ، إحمد ربك يا مُحمد و صليلُه و إذبح ووزع على الفُقراء ، إن شانئك هو الأبتر ، اللي عايرك و هانك يا محمد هو اللي مقطوع من رحمتي .

* وصف نهر و حوض الكوثر *

- نهر الكوثر النبي صلى الله عليه و سلم قال: على حافتيه قِباب من لؤلؤ ، دي عبارة عن بيوت بتاعتنا حوالين النهر بتاع النبي زي قصور كده معمولة من اللؤلؤ ، طينُه أحلى مِن المِسك مائُه أحلى مِن العسل وأبيض من اللبن ، تجد عليها طيور أعناقها كمِثل أعناق الجِمال أكلها أنعم مِنها ، على النهر ده طيور قد الجمال و لحمها ناعم كدة يستاهل فم سعادتك 
حوض الكوثر بقى هيكون في أرض المحشر اللي هو يوم القيامة و المايه بتاعتُه بتيجي من نهر الكوثر اللي في الجنة النبي هيُقف على الحوض ده و هيشربنا بإيدُه الشريفة و اللي هيناولُه المايه سيدنا أبو بكر ، طيب ومين اللي هيشرب من الحوض ده !؟ اللي كان مواظب على الصلاة على النبي ، اللي كان بيحُط النبي قُدامُه فـي كُل تصرُفاتُه كإنُه موجود معاه ، هيُقف سيدنا النبي و إحنا واقفين دلوقتي فـي طاابووور كبييير و مستنين دورنا ييجي و نُقف بين النبي و نشرب مِن إيدُه الشريفة ، إنت قُدامك ملايين دِلوقتي وإنت واقِف مِستني ، بقوا الآفات ، بقوا مِئاات ، قُدامك عشرين واحد دلوقتي ، بقوا عشرة ، بقوا خمسة ، قُدامك واحد و تدخُل تِشرب من إيد سيدنا النبي ، جيه الدور عليك يـا صديقي النبي بياخُد المايه من إيد سيدنا أبو بكر و بيتدير عليك دلوقتي انت دلوقتي شايف النبي شايف تفاصيلُه ، شايف شعرُه ، شامم رائحته العطرة ، سيدنا النبي بيديك الكوبايه و بيقولك بسم الله إشرب

* اجمل يوم فـي الجنة ، نظرتنا لـوجه ربنا الكريم :))

دخلنا جنتنا و شربنا من إيد سيدنا النبي و استمتعنا فـي ملكوت ربنا سُبحانه و تعالى ، وجت أحلى لحظة فـي حياتنا كُلها نظرتنا لله سُبحانه و تعالى ربنا سُبحانه و تعالى هينده على عِبادُه و يقول يـا عبدي هل أنت راضي عني !؟ مُتخيلين !؟ تُعد النجائب ، هنركب زي جمال كده و نطلع بيها الفردوس آخر جنة فـي جنات ربنا و فوقيها سقف عرش المولى عز و جل ، هتتحط منابر من نور زي بتاعة صلاة الجمعة كده بس دي هتبقى من نور ، يجلس عليها اناس وجوههم نور لباسهم نور و منابر من فضة ، على حسب أعمالنا بقى بنقعد على منابر حسب أعمالنا ، وأقل الناس أعمال هتقعد على كُسبان المِسك ، دي جِبال متعطرة مِن المِسك مُتخيل !؟ وأشرقت الأرض بنور ربِها ، هيظهر نور هينور الجنة كُلها ، ربنا سُبحانه و تعالى هيقول يـا أهل الجنة هل رضيتُم !؟ وكُل ده ربنا سُبحانه و تعالى لِسة ما ظهرش فيه بيننا و بينه حِجاب ، يـا أهل الجنة إطلبوا !؟ هنقول يـا رب إرضى عنا ، هيقول الله عز و جل لو لم أرضى عنكُم لِما أدخلتكُم جنتي :)) فلما علِموا أن الله لن يتركُهم ، كان الله عز و جل بيقولك مش هسيبك غير لما تقول ، لما هنتأكد إن الله عز و جل عاوزنا نُطلب ، هنقول أرِنا وجهك ننظُر إليك ، يـا رب إعطف علينا وورينا وجهك الكريم ، فتكشف الحُجب فتتعلق أبصارهُم بـ الله ، الحِجاب اللي بيننا وبين ربنا إتشال و شوفنا اللي كُنا طول عُمرِنا بنحني ظهرنا لعبادتُه ، شوفنا اللي كُنا بنصوم و بنجبُر بخاطِر الخلق و بنتصدق و بنقيم الليل علشانُه شوفنا اللي تاجرنا معاه تجارة ناجحة وبفوائِد كمان ، شوفنا اللي أفضالُه كانت مِغرقانا و كُنا بنِعصيه و بيسامِحنا وبيرزُقنا ، شوفنا الحنين الغفور العفو ، شوفنا خالِق أشرف خلق الله و أحسنهُم خلقاً سيدنا مُحمد ، في ناس هتشوف ربنا سُبحانه و تعالى كُل جمعة و في ناس هتشوفه كُل يوم الصُبح و بليل زي ماقال سيدنا النبي ، يـااااارب ماتحرمنا من لذة النظر لوجهك الكريم :))

- بعد ما سمِعت عن الجنة و عظمة تكوين الله عز و جل هتعمل إيه علشانها !؟ هتعمل إيه علشان تبقى ضيف عند ربنا عز و جل !؟ الجنة أسهل مِما تتخيل ، الكلمة تدخلك جنة ، الرحمة تدخلك جنة ، جبر الخاطر يدخلك جنة ، الحنية تدخلك جنة ، العدل يدخلك جنة ، هتعمل إيه مِنهُم !؟ ولا هتعملهم كُلهُم !؟ تِختار جهنم !؟ ولا شربة من إيد سيدنا النبي و إيد سيدنا أبو بكر مِن نهر الكوثر !؟ أكلة من ثور الجنة ولا أكلة من جمرات جهنم !؟ شربة من سلسبيل ولا شربة من فيضانات جهنم !؟ إنت اللي بإيديك بِتختار ، بإذن الله لسة قُدامك وقت تِختار طريقك لِسة قُدامك فُرصة تِكون جار سيدنا النبي وسيدنا عُمر و سيدنا أبو بكر و سيدنا عُثمان و سيدنا علي و سيدنا إبراهيم و غيرهُم كتير مِن الصالحين ، ولا جار لِلمُفسدين و الطُغاة ، الجنة تستاهل يـا أخي :))

لاتنسونا بالدُعاء والدُعاء لأموات المسلمين جميعاً أن يجمعنا الله بهم في جنة النعيم

                                                                   

                                                                           دعائكُم رجائي 

                                                                            أخوكم في الله
‫                                                                              ‏أيمن سالم‬

‫#‏الجنة_بتناديك‬